सुर्खेत, १८ गते पुष – वीरेन्द्रनगर–९ का टेकबहादुर कुमालका लागि रु ८१ हजार मात्र रकम थिएन, त्यो घरको गर्जो, छोराछोरीको पढाइ र परिवारको भविष्य थियो। आफन्तबाट सापटी लिएर घर फर्कँदै गर्दा बाटोमै रकम हराएपछि उनी दिनभरि हराएको ठाउँ खोज्दै हिँडे, तर कतै फेला परेन। निराश र तनावमा परेका कुमाल साँझ घर फर्किए।
तर समाजमा अझै इमानदारी बाँकी छ भन्ने प्रमाण बनेर लेकबेँसी नगरपालिका, सुर्खेतका प्रेमबहादुर रास्कोटीले बाटोमा भेट्टाएको नगद कुमाललाई फिर्ता गराए। उनले भने, “यो मेरो होइन, कसैको अत्यावश्यक हुन सक्छ,” र रकम खोजी गरेर सही व्यक्तिलाई फिर्ता गरे।
हराएको पैसा फिर्ता पाउँदा कुमालले खुशी व्यक्त गर्दै भने, “मैले त पैसा भेटिन्छ भन्ने आशा गुमाइसकेको थिएँ। यस्तो व्यवहारले समाजप्रतिको विश्वास फेरि जगाइदियो।”
१७ पुस २०८२, शुक्रबार ०९:१३ मा प्रकाशित
