काठमाडौँ ०७ पुष गते— राष्ट्रपति रामचन्द्र पौडेलले फागुन २१ गते तोकिएको निर्वाचन कुनै पनि बहानामा परिवर्तन वा प्रभावित भए मुलुक गम्भीर अनिश्चयतिर धकेलिने चेतावनी दिनुभएको छ।
बिहीबार आयोजित एक कार्यक्रममा सम्बोधन गर्दै राष्ट्रपति पौडेलले संविधान र लोकतान्त्रिक प्रक्रियाको रक्षा गर्न तोकिएकै मितिमा निर्वाचन सम्पन्न हुनु अनिवार्य रहेको स्पष्ट पार्नुभयो। उहाँले निर्वाचन समयमै सम्पन्न गर्नु सरकार, राजनीतिक दल र सम्पूर्ण नागरिकको साझा दायित्व भएको बताउनुभयो।
“निर्वाचन लोकतन्त्रको मेरुदण्ड हो। तोकिएको मितिमा निर्वाचन सम्पन्न हुनु संवैधानिक स्थायित्व र राजनीतिक विश्वासका लागि अत्यन्त आवश्यक छ,” राष्ट्रपति पौडेलले भन्नुभयो।
उहाँले कुनै पनि बहानामा निर्वाचन सार्ने वा प्रभावित पार्ने प्रयासले लोकतान्त्रिक प्रणाली कमजोर बनाउने र देशलाई अन्योलतर्फ लैजाने उल्लेख गर्नुभयो। साथै, निर्वाचन आयोग, सुरक्षा निकाय र सरोकारवाला सबै पक्षलाई जिम्मेवारीपूर्वक भूमिका निर्वाह गर्न आग्रह गर्नुभयो।
राष्ट्रपति पौडेलले राजनीतिक दलहरूलाई आपसी मतभेदभन्दा माथि उठेर लोकतन्त्रको रक्षा गर्न एकजुट हुन आह्वान गर्दै निष्पक्ष, स्वतन्त्र र विश्वसनीय निर्वाचन सुनिश्चित गर्न सबैको सहकार्य अपरिहार्य रहेको बताउनुभयो।
